Ginakabig nga ‘generally peaceful’ pagdumdom sang tigkalalag 2026 sa pangkabilugan sa bug-os nga Western Visayas suno sa Police Regional Office 6 (PRO-6).
Sa interview sang Bombo Radyo kay Police Major Lailyn Sencil, spokesperson sang PRO-6, iya ginpahayag nga nangin matalunsay kag matawhay ang sitwasyon sa mga sementeryo, memorial park kag iban pa nga lugar nga gindugok sang publiko sa tion sang Undas.
Sa pihak sang kadamuon sang mga pamilya nga nagkadto sa mga sementeryo agud magbisita kag magdumdom sang ila nagtaliwan nga mga pinalangga, nangin matalunsay ang implementasyon sang seguridad kag maintenance of order sa amo nga mga lugar.
Suno kay Sencil, dako ang bulig sang temprano nga preparasyon sang kapulisan, estratehiko nga pagplastar sang mga personnel kag komunikasyon sa lokal nga panguluhan kag iban pa nga ahensya sang gobyerno agud mapabilin ang kalinong.
Matandaan nga nag-assign ang PRO-6 sang kabug-usan nga 6,552 ka mga kapulisan, personnel gikan sa iban pa nga law enforcement agencies kag force multipliers humalin Oktubre 31 tubtob Nobyembre 2, 2026 agud masiguro ang kaluwasan sang publiko.
Samtang ginpasalig naman sang natungdan nga magapadayon ang ila paghalong agud mapabilin ang kalinong kag katawhay sa rehiyon bisan matapos na ang Undas.
