ROXAS CITY – Indi pabor ang chairman sang Committee on Transportation and Public Utilties sa Sangguniang Panlungsod sa Memorandum Circular 036-2020 sang Department of Interior and Local Government (DILG) nga naga-ban ukon nagadumili sa mga tricycle, pedicabs nga mag-agi sa national highways.
Ginpahayag ni City Councilor Albert Gregory Potato nga kasubong malabo ang probisyon sang memorandum bangud, indi aplikable ini sa syudad sang Roxas nga ang mode of transportation amo ang tricycle kag mayorya sa mga dalanon nga ginaagyan ang national highway.
Nagapati ang opisyal nga wala gintun-an sang maayo sang yara sa likod sini ang memorandum kag posible nga ila lamang ini ginba-se sa mga urbanized cities kasubong sa Metro Manila, Cebu, Davao,Iloilo sa diin malaka na lamang ang nagagamit sang tricycle.
Samtang ginakabig ni Potato nga impractical ini nga pagsulundan kag wala sang actual study nga natabo sa diin paborable lamang ini sa dalagkuan nga mga syudad nga jeepneys na ang ila nga ginagamit kag may alternatibo sila nga dalan nga ginaagyan.
Nahibaluan nga nasaad sa memorandum ang pagtukod sang task force nga maga-implementar sini kag ang pagformulate sang tricycle route plan nga igasumiter sa DILG apang aplikable lamang ini sa sulod sang duha ka tuig.
