Nagsugod sa iya pagpamangkot si Senator-judge Raffy Tulfo sa testigo sang prosekusyon nga si anay COA state auditor Roderick Wamil sa ika-13 nga adlaw sang impeachment trial ni Bise Presidente Sara Duterte sini nga Miyerkules.
Antes sang pagpamangkot, ginkwestyon ni Tulfo kon may posible nga conflict of interest ang lead defense counsel nga si Atty. Michael Poa.
Apang, ginklaro ni Trial Presiding Officer Francis “Chiz” Escudero nga si VP Sara Duterte ang respondent sa kaso kag indi si Poa, gani wala sang conflict of interest.
Sa pagpamangkot, gin-usisa ni Tulfo kon may iban pa nga ahensya sang gobyerno nga nagsumiter sang mga dokumento nga may indi pamilyar nga mga ngalan ukon alyas sa paggamit sang confidential funds.
Sabat ni Wamil, wala siya sang impormasyon nga nagapakita kon alyas ukon matuod nga ngalan ang nakabutang sa mga dokumento nga ginsumiter sa COA.
Ginpamangkot man ni Tulfo kon ang pagkinahanglan sang mga resibo kag invoice para sa confidential funds mahimo nga magbutang sa peligro sang seguridad sang mga impormante.
Suno kay Wamil, kinahanglan gihapon ang amo nga mga dokumento bilang pamatuod sang mga ginbakal.
