Posible nga magamit ni Vice President Sara Duterte ang iya right to self-incrimination sa tion nga magpungko ini bilang witness sa iya impeachment trial.
Sa interview sang Bombo Radyo kay Atty. Joenar Pueblo, President sang Philippine Arbitration in the Visayas, iya ginpahayag nga mahimo nga mapapungko si VP Sara bilang witness kun ini ang imando sang Senate Impeachment Court.
Suno kay Pueblo, nahibaluan sini nga magapamatok ang kampo sang defense sa plano sang prosecution nga ipatawag si VP Sara bilang witness, bangud sa iya constitutional right batok sa self-incrimination.
Pahayag pa niya, sa tion nga magpungko si VP Sara bilang witness, mahimo sini nga i-invoke ang iya right against self-incrimination sa mga pamangkot nga mahimo magresulta sa iya pag-incriminate.
Ini matapos ipahayag sang prosecution nga ila ginaplano nga ipatawag si VP Sara bilang witness sa iya kaugalingon nga impeachment trial. Apang, wala pa sila nagapangayo sang subpoena sa Senate Impeachment Court.
Dugang pa ni Pueblo, yara sa gihapon sa Senate Impeachment Court ang ulihi nga desisyon kun tugutan ukon pagamanduan ang bise presidente nga magpungko bilang witness.
