Naguba ang kinse (15) ka panalgan nga Mushtaha Tower sa Gaza City matapos ini nga ginbombahan sang puwersa nga Israeli sang Setyembre 5, nga nagresulta sa pagkaguba sang puluy-an sang ginatos nga pamilya, kalakip ang isa ka Palestinian bank employee nga pulo ka tuig nga nagbayad sang mortgage para sa iya nga unit.
Suno sa Israeli military, ang demolition ang kabahin sang kampanya nga nagaguba sa mga establisyemento nga ginaalegar ginapanaguan sang Hamas, kun sa diin masobra 50 ka mga “terrorist towers” na ang ginguba.
Apang suno sa mga residente kag United Nations (UN) Human Rights Office, wala sang mapag-on nga ebidensya nga nagapakita nga may presensya sang grupo nga Hamas sa mga nasambit nga buildings.
Makit-an sa video ang pagtibusok sang building sa sulod lamang sang anim ka segundo, nga nagtuga sang panic kag kakugmat sa mga tawo nga nakapalibot diri.
Suno sa U.N., kaangay ginahungod na sang Israel ang pagpalayas sang mga Palestino sa Gaza City nga ginakonsidera sang grupo bilang ”ethnic cleansing.” Samtang hugot ini nga ginpanginwala sang Israel ang alegasyon ka ginsiling nga katuyuan lamang nila nga gub-on ang Hamas kag ibalik ang mga bihag.
Madumduman nga umpisa Oktubre 2023, masobra 65,000 ka mga Palestinians na ang nareport nga napatay, kag padayon ang malapnagon nga pag-evacuate kag gutom nga naeksperyensyahan sa Gaza bangud sa kinagamo.
