ROXAS CITY – Ikaduha na si Senator Manny Pacquiao sa mga kilala nga personalidad nga ginhatagan sang honorary degree nga Doctor in Humanities (Honoris Causa) sang Filamer Christian University (FCU).
Ginpahayag ni Dr. Minnie Panaguiton Chan, Vice President for Academic Affairs sang FCU nga nangin balasehan sa paghatag sang pagkilala kay Senator Pacquiao, amo ang maayo sini nga nahimuan sa iya isigkapareho sa diin indi lipod sa tanan nga madamo ini sang nabuligan nga mga nagakinahanglan.
Suno pa kay Chan nga indi lamang bantugon sa patag sang boksing si Pacquiao, kundi talalupangdon man ang iya pag-ulikid sa iban nga tawo.
Nahibaluan nga una nga ginhatagan sang Doctor of Humanities sang nasambit nga buluthuan si Dr. Sharon Rose Ruiz Lorendez sa patag naman sang teaching kag religion.
