ROXAS CITY — Ginakasubo sang isa ka pari sang Simbahang Katolika sa siyudad sang Roxas nga masami na karun ginaangut sa paminsaron sang madamo nga mga pamatan-on ang selebrasyon sang Valentines Day bilang okasyon para sa casual sex ukon premarital sex.
Ini nga paminsaron ang bangud sa rasun sang iban nga isa ka pamaagi sang ila pagpabutyag sang pagpalangga sa ila mga nobyo ukon nobya sa Valentines Day amo ang ila pagpakighilawas.
Suno kay Msgr. Cyril Villareal, rector sang Immaculate Conception Metropolitan Cathedral kag vicar general sang Archdiocese of Capiz, wala lang ginapakita ang pagpalangga pinaagi sa pagpakighilawas ilabi na sang mga magkapareha nga wala pa makasal.
Ginpahayag niya nga mapabutyag sa gihapon sang magkapareha ang pagpalangga sa tagsa-tagsa bisan wala sila nagapakighilawas basta ginarespeto lang nila ang isa kag isa.
Suno pa kay Villareal nga ang akto sang pagpakighilawas ang nagakadapat lamang nga ginahimo sang mga mag-asawa kag nagapanubo lamang sa pagkamalahalon sini ang paghimo sini sang mga magkapareha nga wala makasal.
Ginakusubo man ni Villareal nga nadula sa karun sa madamo ang matuod nga balor sang sex ukon pagpakighilawas bangud man sa impluwensiya sang social media kag sang dumuluong nga mga kultura.
