Indi na makatilingala pa para sa isa ka anay mamalidha ang paghingyo sang kampo ni Vice President Sara Duterte sang Temporary Restraining Order (TRO) sa Korte Suprema.
Sa interview sang Bombo Radyo kay Mr. Raoul Manuel, Fomer Kabataan Partylist Representative, iya ginpahayag nga kaangay pangpalawig sa oras ang amo nga tikang sang kampo sang bise presidente agud ma-delay ang desisyon sang House Committee on Justice sa duha ka mga impeachment cases nga ginpasaka batuk diri.
Suno kay Manuel, nagapakita sang amo nga tikang nga luyag ni Vice President Sara Duterte nga punggan sang Korte Suprema ang impeachment proceedings batuk sa iya.
Pahayag niya, kinahanglan nga madayon ang amo nga impeachment proceeding bangud nga isa ini ka dako nga bulig para sa mga nagapangayo sang kaathagan may kaangtanan sa mga alegasyon nga ginpanghaboy batuk sa isa ka mataas nga opisyal sa pungsod.
Nahibaluan nga kalakip sa mga alegasyon batok kay Duterte amo ang ginaalegar misuse of confidential funds, improper declaration of assets, abuse of power, kag ginaalegar pagpamahog kay Presidente Ferdinand Marcos Jr.
Interviewed by Bombo Saira Joy Alu-ad Bautisata | via Bombohanay sa Udto
