ROXAS CITY – Nahangpan sang Capiz Division Superintendent ang sentimyento sang mga estudyante kag ginikanan nga napaslawan nga makahiwat sang face to face graduation ukon moving-up ceremony ang ila bulothoan.
Sa interview sang Bombo Radyo kay Dr. Miguel Mac Aposin, ginpahayag sini nga opsyon lamang ang pagpatigayon sang face to face classes sa probinsya.
Ang desisyon suno diri ang gintugyan na sa PTA kag sa Principal, bangud sila ang mas nakahibalo sa sitwasyon sang ila bulothoan pag-abot sa pagpakigbato sa pandemya.
Madamo suno pa diri sang konsiderasyon kag nagaagi sa proseso antes mapahanugutan ang paghiwat sang face to face graduation, isa na diri ang pagpili sang lugar nga pagahiwatan sang graduation nga mapasiguro nga masunod ang public health protocol sang gobyerno.
Kinahanglan man suno diri ang mangin abiso sang LGU, bangud kun magahinyo ang isa ka LGU sa bulothoan nga indi anay magpatigayon sang face to face graduation, dapat ini nga ikonsiderar sang eskwelahan.
Samtang, nagalaum si Aposin nga sa masunod nga school year sa idalom sang bag-o nga administrasyon, mangin 100% na ang pagpatuman sang limited face to face classes kag graduation sa mga pampubliko nga eskwelahan sa pungsod.
