ROXAS CITY – Gintadlong sang municipal administrator sang Panit-an ang naglapta nga balita angut sa ginaalegar paghold sang municipal government sang social pension sang mga senior citizen.
Ginpahayag ni Mr. Rosauro del Castillo nga kabutigan lamang ang nasambit nga akusasyon kag may lamud pamulitika, bangud indi malipod nga sa masunod na nga bulan ang eleksyon.
Ginklaro ni del Castillo nga indi ang municipal government ang naga-release sa social pension sang mga katigulangan kundi ang regional office sang DSWD.
Ang papel lamang sang munisipyo amo ang paglista sa kwalipikado nga senior citizen nga maka-avail sang programa sang gobyerno kag pag-imporma sa mga presidente sang mga senior citizen sa kabaranggayan sa Panit-an kun may schedule na sa pagrelease sang social pension.
Ginapanindugan pa ni del Castillo nga bisan san-o wala nagapasilabot si Mayor Generoso Derramas sa paghold ukon pagrelease sa social pension sang mga katigulangan.
