ROXAS CITY – Isa naman ka Capizeña Overseas Filipino Worker (OFW) nga nakaba-se sa Kuwait ang naga-apelar sang bulig sa gobyerno agud makabalik na sa Pilipinas bangud sa pagpangbastos sang anak sang iya nga employer.
Sa interview sang Bombo Radyo Roxas kay Ma. Elvie Ordas, sang President Roxas, Capiz, isa ka domestic helper sa Alfarwaniya, Al Rehab, Kuwait, ginpahayag sini nga makapila ka beses na siya nga gintuyo nga sudlon sa kwarto sang anak sang employer kag ginhagad nga maghilawas sila nga duha.
May mga ti-on man suno kay Ordas nga hublas nga nagasulod sa iya nga kwarto ang isa pa ka anak nga lalaki sang iya nga employer kag ginahampangan sa iya atubang ang kinatawo sini.
Aminado si Ordas nga nahadlok na ini sa karon bangud kun sadto ginasaway pa sang iya nga madam ang duha sini ka anak tagsa ka magsugid siya, subong suno kay Ordas, siya pa ang gina-akigan sang iya nga employer.
Nagdangop naman sa talatapan sang Overseas Workers Welfare Administration (OWWA) ang nasambit nga OFW apang ginareklamo sini ang madugay nga pag aksiyon sa iya ginapangayo nga bulig.
Nahibalu-an nga sa Oktubre pa subong nga tuig magatapos ang kontrata ni Ordas apang luyag na sini nga makapauli sa Pilipinas agud indi na mabutang sa alang-alang ang iya nga kabuhi.
