ROXAS CITY – Indi mahupos kag madamo sang nagkalain-lain nga mga pagtilaw ang ginapangatubang sa tion nga sudlon ang responsibilidad sang isa ka amay.
Ini ang ang nangin pahayag ni Mr. Gerry Fuentes Sr., tricycle driver, isa ka amay sang lima ka mga kabataan kag tumandok sang Masbate apang diri na nagapuyo sa syudad sang Roxas sang ma-interview sang Bombo Radyo.
Suno kay Fuentes, nagdako na siya nga isa ka responsible nga bata bangud nagabulig ini sa pagpangisda sa iya amay, gani nahibaluan sini kag nakit-an nga kalakip sa papel sang isa ka amay ang mga pagtilaw nga kinahanglan paga-atubangon.
Nobyembre 24, 1994 sang nangin isa na ka amay si Fuentes kag suno sa iya halo ang iya nabatyagan sang nahibaluan nga nagabusong ang iya asawa, yara ang kakulba kun sa diin indi madula nga napamangkot ang iya kaugalingon kun masarangan ang responsibilidad nga mangin isa ka amay, kasadya kun sa diin diri kag mapamatud-an niya sa iya asawa kag kaugalingon nga wala sang imposible kun may yara sang pagpalangga, pagbakas kag pagpangamuyo.
Ginsiling man sini nga may mga tion nga nadudulaan siya sang paglaum apang bangud sa iya asawa kag mga kabataan liwat ini nga nahatagan sang kusog kag kabaskog agud nga magpadayon.
Indi man madula suno sa iya ang mga tawo nga nagabutong kag nagapakalain sa ila apang sa baylo nga magbalos kag magdumot, ginhimo ini nila nga inspirasyon ilabi na sang ila mga kabataan kun sa diin nagtuon sang instakto kag makatapos sa pag-eskwela.
Dako man ang pagpasalamat ni Fuentes sa iya mga kabataan, bangud sa pihak sang ila nga mga pagpangabudlay kag pagsakripisyo wala nila ini gin-usikan kag gintamasaan.
Mensahe sini sa mga ginikinaan nga tutukan nga mahatagan sang edukasyon ang ila tagsa ka mga kabataan bangud isa lamang ini sa mga regalo nga ila mahimo mahatag kag wala sang sin-o man ang makakuha sini sa ila.
