Makabig nga isa ka dako nga responsibilidad ang pagiging manunudlo kag diri masukat ang paghatag sang malawig nga pasensya, pag-intindi kag maayo nga tagpalamati sa mga estudyante kag madamo pa.
Ini ang ginpakigbahin ni Ms. Rena Marie Bayhon sang mainterview sang Bombo Radyo.
Si Ms. Bayhon ang tumandok sang Tacas, Pontevedra Capiz kag nagtapos sa kurso nga Bachelor of Secondary education Major in English sa Capiz State University (CAPSU) Pontevedra Campus kag Master of Arts in Teaching English sa Filamer Christian University sa karun isa na ka manunudlo sa Pontevedra National High School sa sulod sang apat ka tuig.
Kaangay sang iban nga estudyante indi man nangin madali sa iya ang tanan ilabi na sang nagtungtung ini sa kolehiyo kun sa diin nagakinahanglan sang maid-id nga pagtuon subong man ang problema sa pinansyal.
Apang sa pihak sini tanan, indi ini nangin upang sa iya agud talikdan kag untatan ang iya handum nga mangin isa ka manunudlo kaangay sang iya iloy.
Mensahe sini sa mga estudyante nga itatak sa pinsar ang handum nga luyag malab-ot kag rason sa pagtimakas sa pag-eskwela kag indi magpadala sa mga pagtilaw nga na-eksperyensyahan.
