Gin-void sang Korte ang pagka-alkalde ni Alice Guo sa Bamban, Tarlac matapos nga nagpaguwa sang desisyon si Judge Liwliwa S. Hidalgo sang Hunyo 27, 2025.
Ginhatagan sang Manila Regional Trial Court (RTC) Branch 34 ang quo warranto petition sang opisina sang solicitor general batuk kay Guo bangud wala sang duha-duha nga Chinese ini bangud lunsay Chinese ang iya amay kag iloy.
Nagakahulugan ini nga ‘void’ ukon invalid ang pagka-alkalde ni Guo halin pa sang una. Ginpamatud-an man sang Korte nga si Alice Guo kag ang Chinese citizen nga si Guo Hua Ping pareho nga tawo base sa pareho nga fingerprints.
Ginpanginwala sang legal team ni Guo ang imbestigasyon nga ginpatigayon sang National Bureau of Investigation kag ang akusasyon nga ginbun-ag si Guo sa Chinese parents.
Ginhatagan man pagtamod sang korte nga indi bastante nga ebidensya ang Philippine passport kag birth certificate ni Guo agud mapamatud-an ang iya pagka-Pilipino.
Base sa desisyon, indi mapanghiwala nga Chinese si Guo kag ang iya mga ginikanan kag nag-abot sa Pilipinas gikan sa Fujian, China sang Hulyo 12, 1999.
Ang desisyon sang korte nagdeklarar nga indi lamang sia gin-disqualify sa posisyon sang pagka-alkalde, kundi nga indi man sia makapadalagan para sa sini.
Ginpahayag pa sang korte nga wala nagbag-o ang iya disqualification bisan pa nga napilian siya kag pormal nga nagsumpa sa pwesto.
Gindeklarar man ang desisyon nga indi balido ang iya proklamasyon halin sang gin-file niya ang iya Certificate of Candidacy.
Matandaan nga sadtong Agosto 2024, ginmando sang Office of the Ombudsman ang iya pagpahalin bangud sang iya kahilabtanan sa Philippine Offshore Gaming Operators (POGO).
