ROXAS CITY – Ginkumpirma sang isa ka Ilongga nga nagatrabaho sa Germany ang pagka disiplinado sang mga tawo sa pungsod sa mga pagsulundan sang gobyerno ang rason nga amat amat nga naganubo ang numero sang mga nalatnan sang coronavirus disease 2019 ukon COVID-19.
Sa report ni Bombo International Correspondent Norlyn Gascon, tumandok sang Lambunao, Iloilo kag nagatrabaho sa isa ka massage clinic sa Cologne, Germany sa sulod sang napulo ka tuig nga ginasunod sang mga residente ang physical kag social distancing, bangud isa ini sa masami ginapahanumdum sang gobyerno.
Wala sang panic buying sa mga pagkaon magluwas na lamang sa mga toilet paper nga indi na makita sa mga supermarkets.
Suno kay Gascon nga wala sang curfew nga ginapatuman sa Cologne, Germany kag indi man sila obligado nga maggamit sang mask.
Samtang antes ipaidalum sa quarantine ang Germany nakabaton sang financial assistance ang mga tawo sa gobyerno para magamit sa pagbakal sang ila mga kinahanglanon.
Nahibaluan nga nagalab-ot na sa karon sa 140,000 ang mga infected sang coronavirus disease, 85,000 ang naka-recover kag 4,100 ang napatay sa nasambit nga sakit sa Germany.
