ROXAS CITY – Dalayawon ang pagka-‘pro-active’ sang gobyerno sa Middle East agud mabatuan ang coronavirus disease ukon COVID-19 pandemic.
Ini ang base sa report sa Bombo Radyo ni Bombo International Correspondent Rvin Martino, tumandok sang Bungsuan, Dumarao, Capiz kag nakaba-se karon sa Al Bada, Satwa Dubai.
Ginpahayag sini nga agresibo kag estrikto ang implementasyon sang gobyerno sa mga quarantine protocols kasunod sa pagpaidalom sa lockdown sa pungsod kag pagpatuman sang curfew hour.
Bangud sa manubo nga death rate sang nasambit nga balatian sa pungsod, amat-amat na suno diri nga nagabukas ang pila ka mga establisyemento kag amat-amat naman nga ginabalik ang public transport apang may pila ka mga pagsulundan sa gihapon nga igapatuman.
Gilayon naman nga ginapahibalo sa publiko ang tanan nga ginapatuman nga quarantine instructions kag anuman nga impormasyon may kahilabtanan sa COVID-19 pandemic pinaagi sa ginapadala nga text messages.
Talalupangdon man suno diri ang buhi nga ‘Bayanihan spirit’ sang Filipino community sa pungsod bangud nagabuligay ang mga ini kag wala ginapabay-an ang mga trabahador nga apektado sang ginapatuman nga lockdown.
