Isa ka grupo sang mga mangunguma ang nagpaguwa sang hibubun-ot bangud sa paghatag suno diri sang prayoridad sang gobyerno sa importasyon sang mga produkto sang agrikultura samtang mahimo man nga magkuha sa mga lokal nga produksyon halin sa iban nga rehiyon nga indi apektado sang kalamidad kag kay-uhon man kuntani ang logistics para diri.
Suno kay Leonardo Montemayor, Chairman sang Federation of Free Farmers’ Cooperative, kag anay Agriculture Secretary, kuntani antes nagpaguwa sang announcement ang Department of Agriculture (DA) nga maga-import ini sang mga isda kag produkto sang agrikultura, nagpatigayon anay sang konsultasyon sa mga mangunguma kag mangingisda kun masarangan sang mga ini nga magsuplay sang mga kinahanglanon nga pagkaon sang pungsod.
Pahayag pa ni Montemayor, sa ulihi na lamang dapat magdesisyon ang DA nga mag-import para sa temporaryo nga suplay kun nakasiguro na ini nga kulangon sang suplay sang pagkaon nagikan sa iban nga rehiyon sang pungsod.
Sa karon, ang mga trader ang hilway nga naka-import bangud sa mga layi nga naga-eksister.
