ROXAS CITY – May daku nga epekto sa operasyon sang mga rebelde sa rehiyon Panay ang pagkaaresto kay Francisco Balois ukun kilala nga si ‘Ka Tonying’.
Sa interview sang Bombo Radyo kay Lt. Col. Jay Javines, tagpamaba sang 3rd Infantry Division sang Phillipine Army, ginpahayag sini nga ginakabig nila nga notoryos si Balois pag-abot sa pagpangilkil sa mga negosyante kag mga contractor.
Dugang pa ni Javines nga madugay na ini ginahimo ni Ka Tonying samtang ara sa hublag kag kun indi maghatag sang ila ginapangayo ila ini ginapahog kag ginasug-an ang mga heavy equipment.
Suno pa kay Javines nga madugay na nila gina-operate si Ka Tonying apang madanlog nga nagaresulta sa iya pagpalagyo.
Wala man sila nagapati nga may plano nga mag-surrender si Ka Tonying kay kun tani sang una pa niya ini nahimo agud atubangon ang iya mga kaso.
Samtang nagapasalamat naman si Javines sa mga pumuluyo nga nagakooperar sa ila nga mga militar nga sa tion may mga impormasyon sila nga nabaton pag-abot sa mga rebelde, madasig nila ini nga ginapalab-ot sa mga otoridad.
Ginakabig naman nila nga ang pagkadakop kay Ka Tonying isa sa pinakadaku nga accomplishment.
Dugang pa sini nga magapadayon sila sa pag-aresto sa mga rebelde nga wala nagaplano nga magbalik sa sabak sang gobyerno.
