PANITAN,CAPIZ – Wala sang salabton ang pamunuan sang 603rd Capiz Community Defense Center (CDC) sa Camp Belo, Panitan, Capiz sa pagkadakup sa isa ka army reservist nga nagahupot sang indi lisensiyado nga armas.
Ginpahayag ni 2Lt. Aljon Itucas, executive officer sang 603rd CDC nga nadakpan si Brian Billanes residente sang Barangay Baybay, sining syudad indi bilang reservist kundi isa ka ordinaryo nga indibidwal bangud wala ini sang duty sang nagluntad ang insedente.
Suno pa sa opisyal nga wala man sang issued firearms sa mga reservist sa diin may direktiba nga bawal sila magdala sang armas.
Pananglitan magdala sila sang armas, kinahanglan kumpleto ini sa papeles kasubong sang License to Own and Possess Firearms ukon LTOPF.
Kun ginapatawag sila for active duty matood nga otorisado sila magdala sang armas, apang ini ang issued firearms sang Philippine Army.
Wala man sang ideya si Itucas kun ano ang trabaho sa guha sang talatapan ni Billanes, bangud talagsa lamang ipatawag para sa active duty ang mga reservist.
Nahibaluan nga sa karon may masobra isa ka libo nga reservist sa 603rd Capiz Community Defense Center (CDC) sa diin otomatiko nga reservist ang mga naggraduar sa ROTC.
