ASTURGA, Dimarao, Capiz – Ginatudlo nga ang pagkadula sang kontrol sa ginamaneho ang rason sa pagkamatay sang motorista nga nahulog sa overflow sa Sitio Dinugo, Barangay Asturga, Dumarao, Capiz.
Ang biktima amo si alyas Roy, 56-anyos, residente sang nasambit nga banwa.
Sa interview sang Bombo Radyo kay Police Lieutenant Russell G Husmalaga, Officer in Charge sang Dumarao Municipal Police Station, iya ginpahayag nga nagikan ang biktima sa iya abyan kun sa diin naghalin ini nga nakainom sang makahulubog nga ilimnon kag sang malapit na siya sa gintunaan sang aksidente hinali ini nga nahulog sa overflow sa madalom nga parte sang lugar.
Suno kay Husmalaga kumbinsido naman ang pamilya sang biktima nga wala sang foul play ang natabo kag isa ini ka aksidente ang natabo sa ila nagtaliwan nga himata.
Pahayag pa niya ang kaangay sa sini nga aksidente mahimo man sa gihapon nga malikawan pinaagi sa pag sekyar nga naka kondisyon ang kaugalingon.
Sa karon ginapanawagan sang Dumarao MPS ang mga motorista nga mangin responsable sa pagbiyahe, likawan ang pagmaneho kon nakainom sang makahulubog nga ilimnon, kag magsunod sa mga regulasyon sa dalan agud malikawan ang aksidente.
