Isa sa mga pagpahangkat nga ginapangatubang sang mga ginikanan subong amo ang amat-amat nga paghina sang komunikasyon sa tunga nila kag sang ila mga kabataan, suno sa Commission on Population and Development Region 6.
Ini nga pahayag ang kasunod sang insidente sa Tacloban City sa diin duha ka mga menor de edad ang nagpangluthang sa sulod sang eskwelahan, nga liwat nga naghatag sang igtalupangod sa importansya sang paggiya sa mga kabataan.
Sa interview sang Bombo Radyo kay Regional Director Harold Alfred Marshall, iya ginpahayag nga base sa mga report kag feedback nga nakuha sang mga Local Population Offices halin sa nagkalain-lain nga komunidad sa rehiyon, madamo nga mga ginikanan ang nagakabalaka nga amat-amat nga nagakaguba ang komunikasyon sa sulod sang ila mga panimalay.
Suno kay Marshall, mas dako na ang impluwensya sang mga barkada sa ila mga kabataan kun ipaanggid sa abiso kag paggiya sang ila mga ginikanan.
Pahayag niya, may yara man sang mga kabataan nga nagapamati sa ila ginikanan, apang wala man ini ginakabuhi ukon ginaseryoso.
Sa baylo, ginahimo lamang ini sang kabataan agud mag-untat ang pagsaway ukon malikawan ang akig sang ila ginikanan.
Dugang pa sang natungdan, indi lamang mga ginikanan ang may katungdanan sa paggiya sa mga kabataan, bangud importante man ang involvement sang eskwelahan, komunidad, kag gobyerno sa pagpatuman sang mga programa nga makapabaskog sa importansya, disiplina kag responsable nga paminatasan sang mga kabataan agud malikawan nga makahimo ukon maulamid sa krimen kag iban pa nga sahi sang kapintasan.
