ROXAS CITY – Ginsabat ni City councilor elect Midelo Ocampo ang panawagan sang Commission on Election (Comelec) nga kakason sang mga nagpapili nga mga kandidato sang nagligad nga eleksyon ang ila ginpahamtang nga mga tarpaulins, posters, streamers sa indi gindesignar nga common poster areas karon nga tapos na ang eleksyon.
Nahibaluan nga ginpangunahan ni Ocampo ang pagpangkakas sang mga campaign paraphernalias sa ila barangay agud mamentenar ang katinlo sa ila nga barangay.
Suno sa opisyal nga siya kaupod ang mga barangay tanod kag BHWs ginsuguran na ang pagkakas sang mga campaign paraphernalia bilang pagsunod man sa mandatu sang ahensiya.
Samtang aminado si Ocampo nga malipayon ini nga yara sa ikatatlo nga pwesto sa pagka konsehal sang syudad sa diin isa sa nakita sini rason sa pagpili sa iya sang tawo amo ang pagba-se na karon sang mga botante sa performance sang isa ka lider kag indi na sa kuwarta ukon popularidad.
Kun magapadayon ini suno kay Ocampo indi malayo nga makapili sang maayo, sinsero ukon tampad nga lider nga magpanerbisyo sa mga pumuluyo.
