Apisar nga indi mahupos bangud madamo pa nga gina-konsiderar bag-o maipatuman, ginatun-an na sang Department of Agriculture (DA) kun irekomendar sini nga kakason ang Executive Order No. 62 nga nagatapyas sang taripa sa imported nga bugas kag iban pa nga agricultural products.
Sa pihak ini sang nabalita nga nagnubo na sa subong nga tuig ang presyo sang bugas sa international market.
Ang EO 62 ang temporaryo nga tikang kun sa diin, ginpanubo sa 15% lamang ang taripa nga ginpataw sa mga imported nga bugas gikan sa anay 35% nga ang ginatuyo amo ang mapanubo ang presyo sang bugas.
Ginpatuman ini sang Hulyo 2024.
“Depende ngayon sa mga pangyayari kasi nga bumababa ang presyo, etc. There is a possibility na puwedeng ibalik sa 35%,” pahayag ni DA Spokesperson and Assistant Secretary Arnel de Mesa.
Suno kay De Mesa, madamo pa nga dapat ikonsiderar bag-o mairekomendar nga maibalik sa 35% ang taripa sa imported nga bugas.
Dugang pa sini, dapat kaupod man ang iban nga ahensiya sang gobyerno sa pagdesisyon angut sa ini nga butang.
“Actually, nung nag-usap kami kino-compare kung paano ang walang reduction sa tariff, ano’ng naging epekto sa presyo. Kung meron. So lahat ng possible scenarios ay pinag-aaralan pa,” dugang pa ni De Mesa.
