Totally burned ang isa ka sari-sari store matapos nga masunog sa Barangay Legazpi Ilawod, Roxas City.
Sa interview sang Bombo Radyo Roxas kay SFO1 Junemar Galve, Chief sang Public Information Office sang Bureau of Fire Protection-Roxas City, iya ginpahayag nga padayon pa ang ila imbestigasyon bangud madamo pa sang posible nga ginhalinan sang sunog ang ila ginatan-aw.
Suno kay Galve, isa sa ila ginakonsiderar amo ang electrical wiring matapos may pila ka residente nga naghambal nga nakabati sila sang mabaskog nga lupok halin sa amo nga tyangge antes nagluntad ang sunog.
Sa inisyal nga assessment sang BFP, naglab-ot sa kapin P27,000 ang kahalitan nga ginbilin sang insidente.
Nagpanawagan man ang natungdan sa publiko nga magpalab-ot dayon sa mga otoridad kon may mahibaluan nga may sunog ukon iban pa nga emerhensya agud makaresponde sa labing madasig nga tion.
