ROXAS CITY – Wala sang nakita nga malain si Provincial Administrator Dr. Edwin Monares sa pagkit-anay nanday Presidente Rodrigo Duterte kag Capiz Governor Esteban Evan Contreras sang nagpadulong ang hubon sa Davao City.
Ini ang nangin reaksyon ni Monares sa malisyoso nga mga opinyon sang iban nga mga tawo sa nagguwa nga laragway ni Pres. Duterte kaupod ang gobernador kag Senator Bong Go.
Suno sa opisyal nga normal lamang ini nga magkortesiya ang nagabisita nga mga opisyal sang gobyerno sa mga opisyal sang Davao City, labi na nga natabuan nga yara sa lugar ang presidente.
Nangin maayo man nga kahigayunan ang pagkit-anay ni Governor Contreras kag President Duterte, bangud nakaangkon sila sang tion nga makahinun-anon.
Positibo man ang resulta sang amo nga hinun-anon bangud may good news ini nga nadala pauli sa probinsiya.
Nahibaluan man nga epektibo sa Nobyembre 6, pagabuksan na ang Malasakit Center, sa Roxas Memorial Provincial Hospital, isa sa mga proyekto ni Senator Bong Go nga may bulanan nga pondo nga P5milyones nga gamiton sa pagbulig sa mga Capizeño nga nagakinahanglan.
