ROXAS CITY – Nagpahanumdum ang public information officer sang Provincial Health Office sa sin-o man nga magalapas sa RA 11332 ukon ‘’Mandatory Reporting of Notifiable Diseases and Health Events of Public Health Concern Act” nga may salabton sila sa laye, pananglitan mapamatud-an nga ila ginatago ang ila pag-angkon sang notifiable disease.
Suno kay Ayr Altavas kinahanglan nga magpakig-angut ang mga indibidwal nga may ginasuprer nga notifiable disease agud malikawan ang paglapta sini.
Ginpahayag ni Altavas nga pinaagi sa pagtago sa ginasuprer nga notifiable disease ginabutang sini sa peligro ang kaugalingon nga kabuhi kalakip ang ila pamilya kag ang bug-os nga komunidad.
Samtang nagpamalibad maghatag sang komento si Altavas angut sa wala paghatag sang permit sang City Health Office (CHO) nga makapatigayon sang binayli ang Barangay San Jose sa ila nagahilapit nga kapistahan.
Suno diri nga wala ini sa posisyon nga makatugda sa amo nga isyu bangud yara sila sa Provincial Health Office.
Mas maayo nga ang estoryahon sa ini nga isyu ang pamunuan sang CHO, bangud yara ini sa ila nga hurisdiksyon kag agud mahibaluan kun ano ang ila nangin balasehan.
Apang ba-se sa DOH advisory nga pirmado sang taglikum sang ahensiya nga nasaad diri ang kanselasyon sang pagpatigayon sang dalagkuan nga mga events ukon mass gatherings until futher advise.
Katuyuan sini nga mapaiway ang paglapta sang bisan ordinaryo nga balatian kun wala na nagapadulong sa crowded places ang mga indibidwal nga may ginasuprer nga sakit.
