ROXAS CITY, CAPIZ- Nagapanawagan ang mga opisyales sang Barangay Tiza, Roxas City sa makatudlo sa lalaki nga nakit-an sa Closed Circuit Television (CCTV) nga nagalapta sang mga basura sa isa ka bahin nga indi man sang basurahan sa amo nga lugar.
Sa interview sang Bombo Radyo kay Punong Barangay Dax Noel Alovera, iya ginpahayag nga ginadumilian ang paglapta sang basura bangud nga mahimo ini makatuga sang balatian kag posible mangin rason sang pagbaha bangud nga matabunan ang mga drainages sini.
Suno kay Alovera, nasiplatan ang isa ka lalaki nga sakay sa isa ka colorum nga tricycle sa kagab-ihon nga naghaboy sang basura sa amo nga lugar sa diin nga indi man basurahan ang amo nga bahin.
Pahayag pa nya, posible nga indi lang isa ang nagalapta sang basura kag kuntani untaton na ang kasubong nga buluhaton para sa mas matinlo kag luwas sa katalagman sa ikaayong lawas nga palibot.
Dugang pa sang natungdan, may yara sang padya nga pagabatunon ang makatudlo sang amo nga lalaki agud nga maedukar nila ini sang proper waste disposal.
Interviewed by Bombo Francis Biñas
