Ginpamatukan sang National Union of Peoples’ Lawyers (NUPL) ang paglubong kay anay Senate President Juan Ponce Enrile sa Libingan ng mga Bayani sa Fort Bonifacio, Taguig City.
Suno sa groupo sang human rights lawyers,ang paglubong kay Enrile sa Libingan ng mga Bayani amo ang pagbalewala sa halit nga ginbilin sang martial law kag magaguba sang pundasyon para sa kompensasyon, pagbawi sang propiedad kag pag-ayo sang katilingban gikan sa kalakasan.
Para sa grupo, ang amo nga tikang isa ka seryoso nga pagsuway sang kasaysayan kag isa ka mapintas nga pahanumdom sang amo man nga rebisyonismo sang ginlubong si anay Presidente Ferdinand Marcos Sr. sa amo man nga sementeryo sang tuig 2016.
Ginpanindugan man sang grupo nga ang Libingan ng mga Bayani indi lulubngan para sa mga nagguba sang demokrasya ukon nagpanguna sa sistematiko nga pagpang-abuso, kundi gintuga ini para sa mga nangin inspirasyon kag maayo nga ehemplo, nga suno sa iya wala sa kay Marcos Sr. kag Enrile.
Pahayag pa sang grupo, si Enrile nga nagserbe bilang defense minister sa idalom ni Marcos Sr. siya ang nagpanguna sa sentro sang martial law, pareho sang mass arrests, detentions, torture, disappearance of individuals, media shutdowns, kag ang pagbungkag sang civil liberties.
Subong man, ginpahayag sang grupo nga ang paghalin ni Enrile sa administrasyon ni Marcos Sr sang 1986 ang indi makapanas sang iya mga sala.
Nahibaluan nga sa Nobyembre 22, Sabado, igalubong sa Libingan ng mga Bayani si Enrile, base sa kumpirmasyon sang iya anak nga si Katrina Ponce Enrile.
