ROXAS CITY – Padayon pa sa karon ang imbestigasyon sang otoridad angut sa nagluntad nga sunog sang tinalikdan nga Biyernes sa Mountain B nightspot sa Chonburi province’s Sattahip district sa bahin sang pungsod Thailand.
Ini ang nangin pahayag ni Bombo International Correspondent sa pungsod Thailand Cleo Rose Jondonero sang mapakig-angutan sang Bombo Radyo.
Suno diri indi na bag-o ang pagluntad sang sunog sa pungsod Thailand bangud sang nagliligad nga tuig may mas malala pa nga insidente sang sunog ang nabalhag sa nasambit nga pungsod.
Nagapabilin nga 14 ang nagkalamatay kun sa diin kalabanan sa mga ini ang nasapwan sa bahin sang entrance kag comfort room (CR) sang edipisyo samtang 40 ka tawo naman ang nagkalapilasan.
Dugang pa ni Jondonero, ba-se sa imbestigasyon sang kapulisan, nagikan sa acoustic foam nga nagadikit sa pader nga nagaserbe agud mangin sound proof ang edipisyo ang gintunaan sang sunog.
Samtang wala naman sang nagakaigo nga permit agud mag-operate ang nasambit nga bar bangud patago lamang ang pagbaylo sini nga anay isa ka restaurant.
Magapalab-ot naman sang bulig ang prime minister sang Thailand sa mga biktima kag ginpanugyan man sang gobyerno nga nagakadapat may fire exit kag magsunod sa safety measures ang tanan nga edipisyo ukon talatapan sa ila pungsod agud malikawan pa nga magliwat ang kapareho nga insidente.
