ROXAS CITY – Ginakabig sang pulisya nga ‘case closed’ na ang natabo nga pagluthang-patay sa supervisor sang Golden Claw Security Agency nga si Retired Master Sergeant Joniffer Borda sa Barangay Bolo, Roxas City sadtong Hulyo 20, 2020, Lunes nga adlaw.
Ini ang ginpahayag ni Police Lieutenant Colonel Ricardo Jomuad Jr., hepe sang Roxas City Police Station sang mainterview sang Bombo Radyo kasunod sa pagkaaresto sa tatlo ka mga suspek sa ila ginpatigayon nga operasyon.
Mahibaluan nga kalakip sa naaresto nga mga suspetsado amo sanday Rogelio Padernal, 39 anyos sang Barangay San Jose, Roxas City nga amo ang ginatudlo mastermind ukon utok-utok kag nagplano sang krimen; Garry Onilan, 39 anyos sang Sitio Bato-bato, Barangay Dulangan, Pilar nga amo ang nagserbi gunman ukon nagpangamot sa pagluthang-patay sa biktima kag Ian Abagatnan, 28 anyos sang Barangay Tacbuyan, Estancia, Iloilo nga nagserbi nga driver sang motorsiklo nga gingamit sa krimen.
Suno kay Jomuad nga may nagpalapit sa ila nga witness nga una ginhagad sang mga suspek sa plano nga pagpanghold-up nga amo ang naghatag sang lead sa imbestigasyon sang mga kapulisan.
Dako man ang nabulig sang kuha nga mga CCTV footages gikan sa bangko kun sa diin nag-withdraw sang kwarta ang biktima antes ini ginpatay.
Nakit-an pa sa footages ang isa sa suspek nga si Padernal nga nagasunod sa riding-in-tandem sakay man sa isa ka tricycle rason nga madasig ini nga gin-aresto.
Sa pagpangusisa sang mga kapulisan, diri gintuad man ni Padernal ang kahilabtanan sini sa krimen kag ang ginahamtangan sang gunman nga si Onilan sa banwa sang Pilar.
Sa pagkaaresto kay Onilan sa nasambit nga banwa, narekober diri ang motorsiklo nga gingamit sa krimen, jacket, helmet, 12 gauge shotgun, 22 caliber pistol, 45 caliber pistol kag kwarta nga nagalab-ot sa P25, 000.
Nakit-an pa sa cellphone ni Onilan ang bayluhanay sang mensahe may kahilabtanan sa transaksiyon sini sa ilegal nga droga.
Sa follow-up operation sang mga kapulisan, naaresto naman sa banwa sang Estancia, Iloilo ang nagserbi driver nga si Abagatnan.
Narekober kay Abagatnan ang kapin P9, 000 nga kwarta nga nabilin sa iya nangin parte sa ila nakuha nga kwarta.
Sa dugang nga pagpangusisa sa mga suspek diri nahibaluan nga may duha pa ka mga persona nga imbulbado sa krimen nga amo sanday Romulo Briol alyas ‘Mulong’.
Mahibaluan nga gin-partida sang mga suspek ang nakuha nga kwarta sa biktima kag nagpabilin sila sang kapin P25, 000 nga ila gamiton para sa ila transaksiyon sa ilegal nga droga.
Gindugang pa ni Jomuad nga may isa pa kuntani ka balay nga plano sudlon ang mga suspek agud nga kawatan.
