JAMINDAN, CAPIZ – Ginakabig nga isolated incident ang natabo nga pagluthang patay sa isa ka soldado sang kaupod man sini nga soldado sa Camp Peralta Jamindan, Capiz.
Sa ginpagwa nga press statement sang 3rd Infantry Division (3ID), ginkumpirma sang ila talatapan ang nagluntad nga insidente sa Headquarters sang 6th Cavalry Company, Armor Division.
Nahibaluan nga ang biktima amo si Private First Class Wencel Jay Puntuan kag ang suspek amo si Private First Class Rosarjoe Manajero.
Suno sa 3rd Infantry Division, indi nila pag-i tolerate ang nasambit nga pagbinatasan kag nagapakig-angot sa mga otoridad agud masiguro ang pagpatuman sang hustisya.
Samtang, nagapatigayon man sang separado nga imbestigasyon ang 3rd Infantry Division kag 6th Cavalry Company agud mahibaluan ang bug-os nga detalye kag malikawan na ang kaangay nga insidente.
Ginpasiguro man sang talatapan ang hugot nga pagpatuman sang disiplina kag padayon nga pagpabilin sang kaayuhan, integridad kag kaluwasan sang tanan soldado kag katapo sang Camp Peralta kag iban pa nga kampo nga sakop sang hurisdiksyon.
