Ginkabalak-an sang Department of Education (DepEd) Western Visayas ang padayon nga pagnubo sang enrollment kag iban pa nga access indicators sa Western Visayas, nga nagapakita sang mga pagpanghangkat sa pagpasulod, pagpadayon kag pagkompleto sang basic education sang mga estudyante sa rehiyon.
Sa Regional Basic Education Report sa una nga Regional Assembly of Education Leaders sa Iloilo City, ginpresentar ni DepEd-6 Regional Director Cristito Eco ang performance indicators sang rehiyon sa sulod sang tatlo ka school years.
Suno kay Eco, ang access amo ang una nga promisa nga kinahanglan matuman sang education sector.
Ginkilala niya nga ang datos nagapakita sang makabalaka nga kahimtangan sa access sa edukasyon.
Nagnubo ang enrollment halin sang School Year 2022–2023 tubtob sa School Year 2024–2025 sa Key Stages 2, 3 kag 4, nga nagalakip sang elementary, junior high school kag senior high school.
Ang Key Stage 1 lamang ang wala nagpakita sang pareho nga pagnubo sa enrollment.
Samtang, padayon man nga nagnubo ang gross enrollment rate sa tanan nga lebel sang edukasyon sa sulod sang tatlo ka school years.
Apisar sini, ang senior high school nagpadayon nga may pinakamataas nga gross enrollment rate sa rehiyon.
Nagnubo man ang net enrollment rate sa elementary kag junior high school, samtang may gamay nga pagtaas nga narehistro sa senior high school.
Sa transition rate ukon porsyento sang mga learner nga nagapadayon halin sa isa ka lebel sang edukasyon pakadto sa mas mataas nga lebel, nagnubo ang mga numero sa nagkalain-lain nga lebel sang edukasyon sang School Year 2023–2024.
Apisar nag-stable ang transition rates sa masunod nga school year, nagpabilin ini nga mas manubo kun ipaanggid sa target sang DepEd.
Nagnubo man ang retention kag promotion rates sa elementary kag secondary education sang School Year 2023–2024, antes ini nakarekober sa masunod nga school year.
