ROXAS CITY – Ginpanindugan sang bise gobernador ang ginbuy-an nga promesa nga buligan kag abagahon ang kagastuhanan sang pito ka tuig nga bata nga na-paralyzed ang kamot bangud sa ginaalegar potassium overdoze sang na-confine sa Roxas Memorial Provincial Hospital.
Sa exclusive interview sang Bombo Radyo kay Vice Governor Jaime ‘’Mitang’’ Magbanua, ginpahayag sini nga abagahon sini ang kagastuhanan sang menor de edad agud mabuligan ang pamilya.
Ginkumpirma pa sang bise gobernador ang pagrefer sa isa ka espesyalista sa Iloilo sa biktima agud matsekyar ang kondisyon sang amo nga bata, nga na-paralyzed matapos ginaalegar na-overdose sa bulong.
Indi man makahatag sang konklusyon ang opisyal kun may kapaltahan ang mga doktor ukon nurses tobtob makapaguwa sang findings ang espesyalista.
