ROXAS CITY – Natalana nga suguran subong nga tuig ang pagpa-improved sang mga sports facilities kag equipment para sa mga atleta sang probinsya.
Sa interview sang Bombo Radyo kay Mr. Mathew James Viterbo Provincial Sport Consultant, ginsiling sini nga sa ila ginpatigayon nga paghinala kaupod si Capiz Governor Fredinel “Oto” Castro nahinalaan nga luyag sini himuon nga first class ang Capiz Villareal Stadium kung sa diin nagatraining ang mga atleta nga nagarepresentar sang Capiz.
Suno kay Viterbo, yara na ang plano kag mga design nga kinahanglan bag-uhon sa amu nga edipisyo.
Una diri nga hatagan sang pagtamud ang sports facilities kag equipment nga halos wasak na kag delikado nga gamiton sang mga kabataan.
Ika-duha, magakuha ang gobernador sang mga national level nga coaches kag trainers’ nga magatutok sa mga atleta sang nagkalain-lain nga sports event agud tudluan sila sang modern training subong man ang mga coaches sang probinsya agud kahibalo sila sang modern style nga training.
Luyag man sini nga tutukan ang nutrition sang mga kabataan nga mahatagan sang maayo nga pagkaon, ilimnon kag vitamins indi lamang kung malapit na ang ila nga hampang.
Ginpahayag man ni Viterbo nga ginaganyat ang kada local government unit nga magpahamtang sang ila kaugalingon nga sports facilities agud indi na magpadulong sa syudad ang mga atleta sa ila banwa agud lamang nga magtraining.
Samtang, panawagan sini sa mga nagahampang kag nagagamit sang pasilidad sa stadium nga kun tani hatagan man sang tion nga makatraining ang mga atleta sa tion sang ila training, bangud madamo sang mga reklamo nga nagaguha kung sa diin ginapahayag nga indi makatraining sang maayo ang mga atleta bangud ginadumilian sila sang mga nagahampang.
