Ginaduso sang pila ka senador nga mapabakod pa ang Business Process Outsourcing (BPO) Industry sa pungsod agud malikawan na ang pagsulod sang pila ka Pilipino sa iligal nga Philippine Offshore Gaming Operators (POGO).
Sa Senate Bill 2235 nga gin-file ni Senator Lito Lapid, tinutuyo sini nga maatipan ang kinamatarong kag mahatagan sang proteksyon ang mga empleyado sang BPO.
Nakasaad sa hagna ang pagsiguro sa tawhanon nga pagtratar, bastante nga benepisyo, pribilehiyo kag maayo nga working conditions sa BPO companies.
Hugot man nga igabawal ang “understaffing” ukon “overloading”, igaduso man ang “regularization” sang BPO workers, kag papag-unon ang ila kinamatarong sa “self-organization”, pagpasakop sa “democratic exercises”, kag iban pa.
Oras nga mangin dalayo na nga layi, ang mga magalapas nga BPO company ukon indibidwal ang magapangatubang sa multa nga ₱100,000 kag pagkapriso nga indi magnubo sa duha ka tuig depende sa pagpamatbat sang korte.
