Ginhingyo ni House Infrastructure Committee Co-Chair Terry Ridon sa pamunuan sang Independent Commission for Infrastructure (ICI) nga gilayon nga pun-an ang kakulangan sa ila mga opisyales agud masigurado nga masilutan ang mga involved sa korapsyon sa flood control projects.
Ang pahayag ginhimo sang mamalidha bilang sabat sa panindugan sang Malacañang nga yara na sa kamot sang komisyon ang desisyon sa kapalaran sini bilang independent body.
Suno kay Ridon, crucial gid nga madugangan ang manpower kag makompleto ang set of commissioners sang ahensya agud mangin malapad kag maid-id ang ila imbestigasyon.
Bangud sini, nagapanugyan si Ridon nga magsumiter sang reorganisation plan ukon klaro nga tikang ang ICI kay President Ferdinand Marcos Jr sa labing madali nga panahon agod indi mausik ang naumpisahan na nila nga trabaho.
Apisar ginakilala ang independensya sang ICI, ginhatagan pagtamod sang mamalidha nga kinahanglan sa gihapon sang ahensya ang maathag nga direksyon.
Matandaan nga una nga ginpahayag sang Palasyo nga handa ang Presidente sa pagpamati sa rekomendasyon sang komisyon, nahanungod man ini sa pagtapos sang ila mandato ukon sa pagpangayo sang dugang nga suporta.
