ROXAS CITY – Pabor si Governor Esteban Evan Contreras II nga magpabilin sa Modified General Community Quarantine (MGCQ) ang probinsiya sang Capiz.
Ginhimo ini nga pahayag sang gobernador kasunod sa pagtaas sang numero sang mga COVID-19 cases sa Iloilo kag Negros Occidental.
Suno sa opisyal nga indi sini luyag nga mabutang sa peligro ang mga Capizeño, labi na nga kalapit probinsiya lamang ang Iloilo sang Capiz.
Ginkumpirma man ni Governor Contreras nga sa pagpakig-angut sini sa isa ka opisyal sang Inter Agency Task Force ginpalab-ot sa iya nga kun sila ang pasugtan, mahimo na nga ma-downgrade sa new normal ang probinsiya kalakip ang Aklan, apang problema lamang bangud isa lamang ka Isla ang mga probinsiya sa rehiyon 6.
Pananglitan nga ma-dowongrade na sa new normal ang probinsiya, mangin bukas na ini sa tanan kag mahimo na nga makaguha kag makasulod ang tanan.
Ginpahanugutan man ang pagbiyahe sang mga eroplano, apang gin-athag sang gobernador nga sa iya pagpakig-estorya sa mga airline company, makabig ini nga special trip kag ang ila pasakyon ang mga taga Capiz lamang nga nakapaidalum sa test kag dapat sundon ang mga health protocols.
