ROXAS CITY – Gin-aksyunan sang pamunuan sang Barangay Baybay ang ginpalab-ot nga reklamo sang mga asawa sang apat ka mga trabahador sang gina-construct nga daku nga mall sa Arnaldo Boulevard bangud sa pagdumili sa ila mga bana nga makaguwa.
Ginpahayag ni Punong barangay Reynaldo Magallanes matapos nagdangup sa iya ang mga asawa sang mga trabahador, gilayon sini nga ginpakig-angutan ang project engineer sang Sonio Construction Corporation.
Suno kay Kapitan Magallanes nga gintuad sa iya ni Engineer Robby nga indi sila ang nagamandu nga magpabilin sa sulod sang ila barracks ang mga construction workers kundi mismo ang tagdumalahan sang nasambit nga mall.
Kasubong nga protocol na sang management sang mall nga stay-in ang mga trabahador sa diin may yara man sang kalan-an kag tiyangge sa sulod nga mahimo baklan ang mga construction workers.
Gindugang pa sang opisyal nga ginklaro man sang inhenyero nga wala sang kahilabtanan sa isyu sang COVID-19 pandemic kasubong sa nagaguwa nga report ang rason sa pagdumili nga makaguwa ang mga trabahador, bangud kinaandan na ini nga pagsulundan sang tagdumalahan sang mall.
Ginpahayag nga ginpasiguro man sang inhenyero kay Kapitan Magallanes nga ila man ginabuligan ang mga trabahador sa ila kinahanglanon.
Ginkumpirma ni Magallanes nga nakabulig naman ang barangay sa pamilya sang mga trabahador nga nagdangup sa iya pinaagi sa paghatag sang mga relief goods.
Samtang nahibaluan gikan sa punong barangay nga ginpasalig sa iya ni Engr. Robby nga magahinyo ini sa management sang gina-ubra nga mall nga mahatagan sang tsansa bisan isa lamang ka adlaw sa isa ka semana nga makaguwa kag makapauli ang mga trabahador sa ila pamilya.
