ROXAS CITY – Nagapati ang isa ka residente sa Mabini St., Barangay Inzo, sini nga syudad nga ang masami nga pagpanglimpyo sang palibot ang isa sa lihok agud malikawan nga maistaran sang lamok nga may dala nga dengue ang isa ka lugar.
Ini ang ginpahayag sang isa ka tagbalay, sa nasambit nga barangay, sang napakig-angutan sang Bombo Radyo.
Suno diri, sa kaluoy sang Makaako, wala pa sang bisan isa sa iya pamilya ang nabiktima sang amu nga balatian, gani agud mamentinar ini, ginapabilin nila ang malimpyo nga palibot.
Apang, isa sa problema sa ila lugar amu ang masami nga pagtaas sang tubig sa creek nga rason sa pagsulod sang tubig sa ila balay, sa tion nga magbubo’ ang mamunog nga pag-ulan sa syudad.
Bangud sini, ginasunod nalang nila limpyo ang posible magapondo nga mga basura.
Ginpahayag man sini nga nagalibot man ang ila opisyales sa barangay agud magpanglimpyo.
Sa pihak nga bahin, sa pamangkot kun pabor ini nga i-postpone ang SK kag Barangay elections sa Disyembre 2022, ginpahayag sini nga wala man kita mahimo nga pumuluyo kun magdesisyon ang gobyerno, apang mas maayo suno diri kun maislan naman ang mga opisyales sa isa ka barangay.
