Nagapanawagan ang grupo sang Bayan Panay sa pagpadasig sang pagpatuman sang suspension sang excise tax kag pagbasura sang Oil deregulation law kadungan sang padayon nga pagtaas sang presyo sang gatong.
(FORRO)
Sa interview sang Bombo Radyo kay Elmer Forro, Secretary General sang Bayan Panay, iya ginpahayag nga ang padayon nga pagsaka sang presyo sang gatong ang tuga sang padayon man nga tensyon sa Middle East bangud ang Pilipinas ang dependent sa imported fuel sang iban nga pungsod.
Suno kay Forro, madamu sang mga gasoline station sa pungsod ang gina-take advantage ang tuman nga pagpasaka sang presyo sang gatong apisar makabig iligal na nga pagpanginpulos.
Pahayag pa niya, may pagpangduha-duha sa pag-suspend sa excise tax bangud posible nga kapin P320 billion pesos ang madula sa gobyerno kun ipatuman ang nasambit nga layi.
Samtang, kadungan sang panawagan nga fair hike sang grupo para sa transport sector, lakip man ang wage hike para sa mga mamumugon nga tuman man nga naapektuhan bangud sang domino effect sang pagtaas sang presyo sang gatong.
Dugang pa sang natungdan, kinahanglan nga tun-an sang ma-id-id sang gobyerno ang mga polisa sa gatong kag indi lang basta band aid solution kaangay sang mga fuel subsidy kag cash assistance agud mapahagan-hagan ang kabug-at nga ginapas-an sang tanan.
