LOCTUGAN, ROXAS CITY – Makabig nga isa na ka madugay nga problema sang mga opisyales sang Barangay Loctugan, ang padayon nga pagpadulong sang mga indi nila residente agud magpatigayon sang illegal nga aktibidad sa ila barangay.
Ini matapos nga madakpan ang duha ka mga persona sa ginkasa nga drug buybust operation sang mga otoridad kag natigayon nga madakpan sa patyo sa nasambit nga barangay.
Matandaan nga ginkilala ang mga nagkaladakpan nga sanday Paul John Colasino, 42-anyos kag isa ka minor de edad nga ginkilala kay alyas toto nga lunsay residente sang Barangay Cabug-cabug, President Roxas.
Nakuha sa paghinakop sang mga ini ang 28 tanan ka sachets sang ginapatihan shabu kung sa diin 26 diri ang nakuha kay Colasino kag 2 naman ka sachets sa minor de edad nga may Standard Drug Price kapin P1-M, isa ka calibre .45 pistol kag lima ka mga bala kag P11,000 nga kwarta sa nagkalain-lain nga denominasyon.
Sa interview sang Bombo Radyo kay Barangay Kagawad Michael Biñas, ginsiling sini nga dako ang ila pagkatingala kung ngaman nakalab-ot sa ila nga lugar ang amu nga mga person agud didto magpatigayon sang indi maayo nga buluhaton.
Suno kay Binas nga wala sila nagapabaya sang ila obligasyon sa ila barangay kag sa pagkamatuod suno diri gab-i-gabi- sila nagapatigayon sang roving.
Mensahe sini sa mga pumuluyo nga pananglitan may ma-obserbahan ukon makit-an nga daw kaangay makaduluda nga butang gilayon nga ipahibalo sa ila barangay agud gilayon nga mahatagan sang aksyon.
