Isa ka temporaryo nga solusyon ang pagpahamtang sang isa ka Bailey Bridge sa narumpag nga taytay sa bahin sang Barangay Agojo, Panay, Capiz.
Sa interview sang Bombo Radyo kay Panay Mayor Jonathan Besa, iya ginpahayag nga nagkighinun-anon ini sa First District Engineering Office sang Department of Works and Highways (DPWH) kag didtu ginpatpat nga nagpaguwa na sang instruction ang regional office nga pagahimuan sang Bailey Bridge ang amo nga taytay.
Suno kay Mayor Besa, ang amo nga bailey bridge ang himo sa steel plate nga iga-angot sa nabilin nga parte sang taytay.
Ang ini nga temporaryo nga tulay ang mahimo agyan sang mga light vehicle kag pedestrian kag hugot nga bantayan sang mga barangay tanod agud wala sang mga dalagku nga salakyan ang maka-agi.
Pahayag pa niya, matapos ang nasambit nga bailey bridge sa sulod sang tatlo ka adlaw tubtob isa ka semana.
Sa subong, padayon ang pagpangita sang dugang nga bulig sang talatapan para sa permanente nga solusyon gikan kay Capiz Governor Fredinil Castro kag First District Congressman Howard Guinto.
Nagapangayo man sang pag-intindi ang natungdan sa mga pumuluyo sang Barangay Agojo kag bug-os nga banwa sang Panay kag ginpasiguro nga wala naga-untat ang ila sini nga talatapan sa pagpangita sang pamaagi agud masulosyunan ang nasambit nga problema.
