Nagapati ang gobernador sang probinsiya sang Capiz nga kasubong imposible nga mapaidalum sa Modified Enhanced Community Quarantine (MECQ) ang probinsiya sang Capiz bangud wala malab-ot ang pila ka mga parameters nga ginapangita sang National Inter-Agency Task Force (National IATF).
Ginpahayag ni Capiz Governor Esteban Evan Contreras II nga ba-se sa iya opinyon malayo nga maaprubahan sang NIATF kun ang bug-os nga probinsiya sang Capiz ang ipaidalum sa MECQ bangud indi tanan nga banwa sang Capiz ang may mataas nga kaso sang COVID-19 kag iban nga mga LGUs ang wala nagrequest nga batakon ang ila nga quarantine status.
Suno pa sa opisyal nga ini man ang pahayag sang mga eksperto nga mabudlayan nga ma-qualify para mapaidalum sa MECQ ang probinsiya bangud wala nalab-ot ang mga parameters nga ginapangita sang NIATF.
Nagapati ang amay sang probinsiya nga bisan wala sa MECQ ang isa ka lugar, mahimo nga makontrolar ang pagtaas sang COVID-19 cases, basta istriktuhon lamang ang pagpatuman sang minimum health protocols.
Samtang nahibaluan nga isa si Mayor Leodegario ‘’Jun’’Labao Jr., sang banwa sang Mambusao sa mga LGU nga nagpahayag sang interest nga ipaidalum sa MECQ ang ila lugar bangud sa nagataas nga kaso sang COVID-19.
Gindayaw man sang gobernador nga sa wala pa, nagpatuman na ang alkalde sang istrikto nga minimum health protocol kag ginpasangkad pa sini ang border control agud masiguro ang nagapasulod kag nagaguha sa ila lugar.
