ROXAS CITY – Paborable para sa Commission on Elections ang pagpirma ni Presidente Rodrigo Duterte sang hagna nga nagapaiway sa Barangay kag Sangguniang Kabataan (SK) elections.
Ini ang ginpahayag ni Capiz Provincial Election Supervisor nga si Atty. Wil Arceño sang mainterview sang Bombo Radyo.
Suno kay Arceño, isa ka ‘relief’ para sa ila nga hanay ang pagpaiway sang Barangay kag SK elections sa masunod nga tuig 2021 kag pagsaylo sini sa tuig 2022.
Patimaan ini suno kay Arceño nga magauntat na sila para sa paggastos kag preparasyon para sa amo nga eleksiyon.
Suno kay Arceño nga indi man mangin mabudlay para sa Comelec pananglitan magdungan ang Barangay and SK elections kag Presidential elections sa tuig 2022 bangud sa bulan pa man sang Disyembre ang local elections.
Magluwas diri suno sa iya, ang local elections lamang ang manual bangud automated naman ang national elections.
Bangud sa pagpaiway sang Barangay and SK elections, lauman suno kay Arceño nga magataas pa gid ang voters nga marehistro sang komisyon.
Bangud man diri suno kay Arceño mapalawig pa ang termino sang mga barangay officials.
Matandaan nga ginpirmahan na ni Presidente Rodrigo Duterte ang Republic Act 11462 nga nagapaiway sa Barangay kag Sangguniang Kabataan elections.
Sa baylo nga Mayo 2021, patigayunon na ang masunod nga Barangay kag SK elections sa Disyembre 2022.
Ginpirmahan sang presidente ang bag-o nga laye sa ceremonial signing sa Palasyo sang Malakanyang.
Mahibaluan nga katapusan ginpatigayon ang Barangay kag SK elections sadtong Mayo 2018.
