ROXAS CITY – Nagapadayon sa karon ang pagpakaayo sa atop sang Capiz Rehabilitation Center (CRC) matapos nga ginhalitan sang Bagyong Ursula sang tinalikdan nga tuig.
Ini ang ginpahayag ni Provincial Jail Warden Arjuna Yngcong sang mainterview sang Bombo Radyo.
Suno kay Yncong nga nagpain ang gobyerno probinsyal sa idalom sang administrasyon ni Capiz Governor Esteban Evan ‘Nonoy’ Contreras sang pondo nga nagalab-ot sa P750,000.
Ginpahayag sini nga nagasugod na ang pagpakaayo kun sa diin lapit na lamang ini matapos.
Magluwas diri may pila naman ka mga programa nga ginahinyo ang CRC para sa mga inmates.
Mahibaluan nga nagalab-ot sa 296 ang numero sang mga inmates sa CRC.
Samtang, hugot sa gihapon nga ginapatuman ang mga minimum health standards sa amo nga pasilidad agud malikawan ang COVID-19 virus.
