Ginapanindugan sang gobernador sang probinsiya sang Capiz nga pulitika ang yara sa likod sang pagpakatig-a sang Sangguniang Panlalawigan nga aprubahan ang ginarequest nga supplemental budget sang Roxas Memorial Provincial Hospital para maswelduhan ang mga medical frontliners sa amo nga ospital.
Ginpahayag ni Governor Esteban Evan Contreras II nga sa sobra nga pagpamulitika sang SP, mga tawo ang naipit kag naapektuhan.
Suno pa sa opisyal nga kun ipton siya, siya na lamang kuntani kag indi na pagdalahigon ang mga frontliners bangud nagarisgo na sila sang ila kabuhi pinaagi sa pagserbisyo.
Magluwas sa mga frontliners, apektado man sa pagpakatig-a sang mga board members ang mga pasyente sang RMPH.
Naghinyo ini sa sanggunian nga ipaiway anay sa karon ang pulitika pag-abot sa social services, bangud madamo ang maapektuhan kun magapadayon ini.
Ginakabig man ni Governor Contreras nga kasubong sa health sabotage ang ginahimo sang Sangguniang Panlalawigan.
Liwat ginpanindugan sang gobernador nga handa sini atubangon ang responsibilidad pananglitan may makita nga iregularidad ukon anomaliya nga nagakahinabo sa RMPH ang mga board members.
Samtang indi pabor si Governor Contreras sa ginapatigayon nga head count sang sanggunian sa mga empleyado sang RMPH agud masiguro nga naga-eksister gid man ang nasambit nga mga JO’s ukon contract of service.
Suno diri nga kasubong insulto ini sa mga empleyado bangud kasubong nga ginadudahan sila nga mga ghost employees.
Ginpa-tsekyar naman sini sa legal department kun legal bala ang nasambit nga lihok.
Nagalaum si Governor Contreras nga kuntani matandog man ang mga board members kag maaprubahan na ang supplemental budget sang RMPH para maswelduhan na ang mga frontliners.
