Pagpakay-o sang ginareklamo nga dalanon sa sitio benlit, brgy bilao wala nalakip sa 2022 budget; farm to market road igaprayoridad sa 2023

ROXAS CITY – Wala nalakip sa 2022 budget ang pagpakay-o sang madugay na nga ginareklamo sang mga residente nga dalanon sa Sitio Benlit, Barangay Bilao banwa sang Sapian.

Ini ang ginpahayag ni Atty. Joe Villanueva, alkalde sang nasambit nga banwa sang mainterview sang Bombo Radyo.

Suno kay Mayor Villanueva, matapos nga nakalab-ot sa iya ang reklamo gilayon nga nagpangita ini sang pamaagi agud mabuhinan ang problema pag-abot sa nasambit nga dalanon ilabi na sa mga estudyante.

Ginsiling sini, nga apisar wala sang nagakaigo nga pondo ginpatambakan niya ini sang boga agud mapahagan-hagan ang kaligna apang na-atrasar man ini bangud sa pag-inulan.

Gintuad man sang alkalde, nga sa masunod nga tuig, igaprayoridad na sini ang farm-to-market roads sa mga kabarangayan.

Nagapangayo man ini sang gamay nga pag-intindi sa mga pumuluyo angut sa amu nga dalanon, bangud duha pa lang siya ka bulan nga nagapungko bilang alkalde sang banwa.

Nagapromisa man si Villanueva, nga hatagan sang igtalupangod ang nasambit nga dalanon.