ROXAS CITY – Paga-unahon nga iga-implementar ang pagpakay-o sang provincial roads sang mga kabanwahanan nga sakup sang premiero distrito.
Ini ang ginkumpirmar ni former board member Weldie ‘Tambol’ Apolinario, gin-designar ni Governor Fredenil Castro nga in-charge sa mga proyekto sa Capiz, sang mainterview sang Bombo Radyo.
Suno kay Apolinario, sa karon nga aprubado na ang Annual Investment Plan (AIP) 2022, bukas na for bidding agud nga masuguran na ang pagpakay-o sang mga dalan nga lakip sa 20% fund nagabalor sa P218 million ang pagpakay-o sang Palagian provincial road sa Maayon, kapin 6 ka provincial roads sa Panay, 3 sa Panit-an, 6 sa Pilar, may yara man sa President Roxas kag Pontevedra.
Samtang, pag-abot sa provincial roads sa segundo distrito, ginapanan-aw diri ni Apolinario nga pagahatagan ini sang importansiya kag ginatugyan na ini sang gobernador sa iya tiayon nga si 2nd district Congresswoman Baby Jane Castro.
