ROXAS CITY – Madamo sang mga pamaagi agud mapakilala ang probinsiya sang Capiz sa iban nga lugar.
Ini ang nangin reaksyon ni Provincial Tourism and Cultural Affairs Officer (PTCAO) Alphonsus Tesoro kasunod sang kontrobersiyal nga introduction ni Mariam Lara Ashraf Abd El Hamid sa promotional video sang Miss Universe Philippines 2020 kun sa diin isa siya sa mga kandidata kag nagatiglawas sa probinsiya.
Sa amo nga video, nagpakilala si Mariam nga siya ang naghalin kag naga-representar sa lugar sang kabalaka sa diin iya ginatumod ang probinsiya sang Capiz.
Mahibaluan nga ang tinaga nga “kabalaka” amo man ang slogan sang administrasyon ni Governor Esteban Evan Contreras nga gingamit man niya sang panahon sang kampanya.
Sa exclusive interview sang Bombo Radyo kay Tesoro, ginpahayag sini nga wala siya sang ideya kun ano ang interpretasyon kag kun ano ang nagtulod sa beauty queen sang gingamit sini ang tinaga nga ‘kabalaka’ sa pagtumod sa probinsiya.
Apang suno sa opisyal, nagadepende man kun kaisa sa konsepto ukon tema sang pageant ang introduction sang isa ka kandidata.
Ang karun nga Miss Universe Philippines 2020 ang may tema nga ‘’Confident, beautiful, and empowered Filipinas.”
Aminado si Tesoro nga ginkakibot niya ang magkatuhay nga reaksyon naggikan sa mga netizens angut sa introduction ni Mariam, apang para sa iya, nagapakita lamang ini sang concern kag pagpalangga sang mga Capizeño sa Capiz.
Ginpahayag man sang opisyal nga nagbulig ang PTCAO sa preparasyon ni Mariam sa pageant pinaagi sa paghatag sang suhestiyon sa mangin costume sang beauty queen kag sa ila pag-feature sa mga tourist attractions sa probinsiya nga kinahanglan man ini nga i-base sa tema sang kumpetisyon.
Sa pihak nga bahin, ginpaathag ni Mariam sa iya pahayag sa Facebook nga gingamit niya ang tinaga nga ‘kabalaka’ sa iya introduction bangud kilala man ang mga Capizeño nga nagakabalaka sa isa kag isa.
Aminado man si Mariam nga gingamit niya ang tinaga nga ‘kabalaka’ bangud ini ang slogan sang gobernador. Gindugang pa sang beauty queen nga indi niya magamit ang slogan nga ‘seafood capital’ sa pagtumod sa Capiz bangud ini nga slogan ang nagatumod lamang sa Roxas City.
Nagpangabay man siya sa mga netizens nga sa baylo nga pakalainon siya, maghatag na lamang sila sang nagakaigo nga mga suhestiyon bangud ginahimo man niya ang iya masarangan sa amo nga pageant.
