Ginkumpirma ni Mayor Ronnie Dadivas ang paghinyo sa Regional Inter-Agency Task Force (RIATF) sa pagpalawig sa Modified Enhanced Community Quarantine (MECQ) sa syudad.
Ginpahayag sang alkalde nga nagsulat na ini sa RIATF kag naghinyo sang extension sa MECQ quarantine status sang Roxas City sa diin gin-endorso man ini sang Provincial Inter Agecy Task Force (PIATF).
Suno kay Mayor Dadivas nga indi bastante ang 16 diyas nga ginpaidalum sa MECQ ang syudad para mapanubo ang kaso sang COVID-19.
Apang aminado ang opisyal nga daku ang nabulig sang MECQ para mapahagan hagan ang pagtumpok tumpok sang mga tawo bangud sa mga restrictions nga ginapatuman humalin sa border checkpoint pasulod sa Roxas City.
Gindayaw man ni Dadivas ang ginapatigayon nga barangay checkpoint sa diin indi gilayon makaguha ang mga pumuluyo kun indi lamang importante ang ila nga kaladtuan.
Aminado man ang opisyal nga may pila ka mga sektor nga apektado labi na karon nga naghinyo nga palawigon pa tobtob sa Hulyo 1, 2021 ang MECQ, apang dapat maintindihan sang tanan nga ginahimo ini sang gobyerno agud matapna ang pagtaas sang kaso sang COVID-19.
KInahanglan man nga magsakripisyo sang gamay para sa kaluwasan sang tanan bangud indi lahog lahog ang COVID-19.
Nagpasiguro man ang alkalde nga sa kasubong sini nga sitwasyon mas ginpasangkad pa sang gobyerno ang Food Security Program sa diin may ginahatag nga ayuda ang gobyerno sa apektado nga sektor.
Samtang nahibaluan nga bangud sa ginakulang na ang mga hospital beds sa mga ospital, ang 16 ka mga hulot sa hortus botanicus gin-convert nga intermediate care facility sa diin magaserbe ini nga holding room para sa mga mild ukon moderate COVID-19 patients.
Naghinyo man sang paghangup ang alkalde sa publiko sa diin ang sarang na gid lamang nga mangin kontribusyon sang mga pumuluyo amo ang kooperasyon sini bangud nagahimo sang tikang ang gobyerno agud matapna ang COVID-19.
